سب کی نظر ہے اپنے مفادات کی طرف

نظم

صباحت عروج

دوڑیں لگی ہوئی ہیں عبادات کی طرف

سب کی نظر ہے اپنے مفادات کی طرف

 

مجھ کو پتہ ہے چپ کے خسارے تو ہیں ، مگر ۔۔

کیسے گھسیٹ لاؤں اسے بات کی طرف

دیکھا ! حسین شخص نے نقصان کر دیا

کس نے کہا تھا جا تُو فسادات کی طرف 

عادات سر کے ساتھ ہی جاتی ہیں میری جان 

آخر پلٹنا پڑتا ہے عادات کی طرف 

بے چینیاں ، مصیبتیں ، وحشت ، اذیتیں ۔۔

اک دن چلو گے تم بھی مکافات کی طرف

 خود سر اٹھا کے چلنے کے قابل نہیں ہوئے 

انگلی اٹھا رہے ہیں مری ذات کی طرف

بے حرمتی کسی کی ہو ، دکھ مجھ کو ہوتا ہے 

میرا خیال جاتا ہے سادات کی طرف

صباحت عروج